خرج عدد من الشباب المصري يوم أمس في الذكرى الرابعة لثورة 25 يناير للتعبير عن غضبهم من فشل الثورة وخصوصاً بعد مقتل الناشطة اليسارية شيماء الصباغ.
وقد قام سامح ابو عرايس رئيس الجمعية العربية للمحللين الفنيين باتهام الفنان خالد الصاوي بأنه وراء ما تعانيه مصر، وذلك من خلال القائه تعويذة سحر في نهاية فيلمه الفيل الأزرق فكتب على حسابه الشخصي في الفيسبوك قائلاً: " الشباب الهايج على الدولة الأيام دي هو بسبب التعزيمة السحرية اللي قالها خالد الصاوي في فيلم الفيل الأزرق وأيامها لما قلت كده الناس استغربت . التعزيمة دي كانت بكلمات بابلية وعبرية قديمة وتؤثر على ناس كتير من اللي سمعوها وتجعلهم تحت سيطرة اليهود لتحريكهم ضد الدولة . يعني الشباب دول مسحورين علشان كده لو اتكلمت مع حد منهم تلاقيه اتنرفز واتعصب لأنه مسحور وتعرض لتعزيمة سحرية !!"
ليقوم الفنان خالد الصاوي بالرد على هذا الإتهام عبر حسابه الخاص في الفيسبوك قائلاً: " انا بقالي خمس دقايق بضحك لحد ما دموعي نزلت فعلا وده لم يحدث لي ابدا مع اني بقالي خمسين سنة بضحك smile emoticon
نتكلم جد حبة بقى.. ادعو دارسي العبرية -قديمة وحديثة- والضالعين في البابلية -وبالمرة الاشورية والسريانية- ان يأخذوا فاصل قصير من اي شيء بيعملوه ويقروا هذه القطعة النادرة من طرائف المواطن المدعو أبو العرائس مع احترامي لكل العرائس -من عروسة المولد الى العروسة اللي بيخرموها درءا للحسد- وبعد ما يضحكوا ويدمعوا يردوا على معاليه بالعلم اللي هو طارح نفسه كمتبحر ضليع فيه.
أما الجزء اللي يخصني ولازم أقوله المرة دي (لما نزل الفيلم تطوع البروفيسير سامح عرايس بتحذير الناس من التعويذة للاسباب بتاعته وكدت أرد فطلب مني مخرج الفيلم وصديقي العزيز مروان حامد تجاهل الامر فسكت لأنه قائد العمل وانا اقدس الانضباط المهني، لكن المرة دي مفيش اي خطر عالفيلم من لغط يناله زائد ان البرنس عرايس عدى منطقة الهيس الى الوقاحة واتهامنا بحاجات اكبر من ان اي حد يعديها)
مش عارف رأي المحامي حيكون ايه لأني حاسس اني محتاج احبسه بصراحة اكراما لبقه اللي بيشر سب وقذف في حقي وانا عضو بكل الحركات والموجات الوطنية من سن 17 لسن 50 يعني من ايام ما كان سامح ابو عرايس لسه عروسة صغننة!
وختاما يا سادة
التعويذة في الفيل الازرق مش اي لغة، دي حاجة اخترعناها انا ومروان واحمد مراد المؤلف وهي عبارة عن كم سطر كتبهم مراد بالعربي ثم قلبنا الحروف smile emoticon بس كده
كان المطلوب نحسس المشاهد انها لغة من عائلة اللغات الشرقية القديمة اللي ممكن نائل يتكلمها لحظة غضبه وتكبره فيواجهه البطل اللي حل اللغز باسم من اسماء الله الحسنى -المانع- فيتحرق.
عذرا اخي مروان واخي مراد كان لازم اوضح للناس -حتى لو سامحت في حقي فمش حقدر اسكت عن حقهم في معرفة ما لحق بهم من اساءة
وتضليل يصلوا لمرحلة الفسق فنحن هنا امام تهم واطية -خيانة وشيطنة وصهينة- بلا اي سند وبالباطل فقط بهدف الايقاع بين الناس واشاعة الشك في بعضهم بل وزعزعة سكينة الايمان جواهم وهو ما قد يرقى الى مرحلة الشرك بالله طبقا للعقيدة الاسلامية -والله اعلم- حيث يعلن بو عرايس ان سبب الاضطراب عائد لا الى القضاء والقدر بل الى تعزيمة شيطانية وسحر"
